Entama ochobre con tradición

Llega ochobre y col su rurun de vientu tamién  la Escuela de Música Tradicional Reija, un proyectu que entamó nel añu 1995 al dase cuenta dellos componentes del Grupu Reija , que nel entornu de l’agrupación y nel ambiente que se movien había una necesidá de tresmitir enseñances sobre instrumentos tradicionales y sobre too no relativo a pareyes de gaita y tambor que supieran tocar pa grupos.

La escuela, nel so entamu, daba clas de curdión, gaita y tambor. Llueu añadióse pandereta, panderu cuadráu, baille, llinguaxe musical y cultura tradicional. La crecedera de la demanda llevó a la Escuela de música tradicional Reija a ufiertar les clases amás de nel C.P. Eulalia Álvarez Lorenzo (La Felguera), onde entamó la so actividá, nel C.P José Bernardo (Sama) y en La Pola de Llaviana.

Una de les ventaxes de la escuela de música tradicional «Reija» de Llangréu ye que la propia escuela facilita l’instrumentu y el material didácticu. D’esta manera, l’escolín nun tendrá que facer un desembolsu importante de perres hasta qu’él lo decida, en casu de que siga afondando nel so aprendizaxe. Nun hai edá concreta pa entamar, nin por mozu nin por vieyu. La escuela adaptaráse a les posibilidaes del alumnu. Dempués del aprendizaxe individual del instrumentu, ponse en comuña lo aprendío con otros alumnos na modalidá de conxuntos musicales (pareya, bandina, etc.).

Anguañu cunta col so aula itinerante que permite a la mesma ufiertar  el so programa a asociaciones y otres entidaes.

Pa cueyer más información pué pasase pol colexu Eulalia Álvarez Lorenzo de La Felguera los martes o los jueves de ochobre a xunu a partir de les 18 hores o pol corréu electrónicu info@reija.as