Sefa Campón. Colaboradora y cuencata.

Monólogos y conversaciones d’un cuencata

 

Lo que faltaba pal duru.-

– Coñu, ¿volvisti ho?

– Nun volví, toi…, porque nun marché pa nengún llau.

– Entós ¿qué ye de la to vida, nun se te ve’l pelu dende fai tiempu?

– Salgo poco de casa, esta temporá ando un pocu gachu.

– ¿Dalguna novedá na familia?

– Marchóme la fía pa Finlandia d’enfermera.

– Vaya por Dios home, h.ódeme pola to neña y pola to muyer.

– Hostia, ¿nun te h.ode por mi ho?

– Por ti nin gota caradura, que me tuvisti tocando los coyones sin parar cuando la to amiga Báñez falaba de la emigración de los xóvenes como si tuvieren diendo de vacaciones. ¿Nun t’alcuerdes de los famosos intercambios y la movilidá esterior y de qu’había que velo con naturalidá?

– Los roxos que rancorosos sois, tenéislo too apuntao.

– Si fuéremos rancorosos… ¿ónde tabeis tu y los tuyos?

– Si nun lo veo nun lo creo, en vez de consolar al amigu, non, a da-y hosties sin parar, qué vergüenza, ¿eh?

– Si te les hubiere dao de verdá y a tiempu, igual t’había fecho un favor.

– Cuéstame trabayu creyer que te llevo aguantando dende fai cincuenta años.

– Pues nun te digo ná lo que me cuesta a mi. De xuru que ye por pura costume.

– ¿Qué tien que ver la mala educación cola costume?

– ¿ Agora pasamos de la emigración a la educación ho?

– Nun fici tal cosa, taba falando de la to mala educación, non de la otra.

– Calla, calla, de la otra meyor que nun fales, porque acabo dándote como te pongas a defender al sacristán…,quiero dicir al ministru Wert.

– Como vos h.oden les persones con idees firmes.

– Lo que faltaba pal duru, agora los que nun escuchen a naide son xente que tienen idees firmes, quita p’allá.

– Wert defende lo que cree, non como otros, que defenden unu y faen otro.

– Oyi, neso tengo que date parte razón. Wert cree nel clasismu más estremu, nel Opus Dei y nuna universidá pa la élite y fizo un traxe a midía pa consiguilo. Los otros, como dices tu, modernizaron y abrieron la Universidá al pueblu, pero cagáronla prauticando la política del remilgu y la contemplación cola Ilesia y la derecha. Espero que seya una llección aprendía y nun vuelvan a les mesmes nel futuru.

– Hostia, que respigu, paezme que toi na plaza roxa de Moscú y que ta falando Lenin.

– Pues non, como dicen los de la Cocacola tas na rede social más grande, nel llugar onde siempre somos más felices… nel benditu chigre, anque güei, col concursu dalgún faltosu, pue ser la esceición y nun lo consigamos.