La Casona del Bravial acueye una esposición sobre cómic n’asturianu en realidá enanchada
A partir del xueves 6 de payares va poder visitase na Casona del Bravial de Blimea la esposición “Traducción y cómic n’asturianu en realidá enanchada”, que va tar abierta al públicu nesti centru hasta’l 28 de payares n’horariu de 9 a 13 h. de llunes a vienres.
La realidá enanchada ye’l términu que s’emplega pa definir una visión per mediu d’un dispositivu teunolóxicu, nesti casu cualesquier dispositivu móvil, en concretu cola aplicación Layar, qu’añade información virtual a la información física yá esistente. Esta esposición yá pudo vese’l pasáu mes de xunu nel Centru d’Educación de Persones Adultes del Nalón gracies al trabayu desendolcáu polos alumnos de Llingua y Lliteratura Asturiana d’esti centru de la mano del so profesor, Xuan Santori.
Los visitantes a la muestra van poder atopar material espositivu en formatu físicu sobre’l cómic n’asturianu, que se pue ampliar con archivos d’imáxenes, videos, documentación de blogues y páxines web que s’activen al ser escaniaos cola aplicación Layar. Asina van poder tener accesu a una amplia información sobre los dibuxantes y los comics más destacaos del panorama rexonal.
Esta esposición inxértase dientro de les actividaes programaes pa les XIII Xornaes de Lliteratura Infantil y Xuvenil de Samartín del Rei Aurelio, qu’incluyen amás teatru infantil y talleres de llectura.