Enxamás

Ya tengo unos cuantos años y tocome vivir de too un poquiñín. De guah.e viví  na época de Franco. Dempués eso que nomaren “transición y agora esta cosas rara que dicen ye “democracia”. Sigún se mos anunciaba, esto postrero yera lo que realmente valía. Tocome gastar playeru peles cais d´Uviéu delantre de los “grises” de la época, escuchar el aullíu de les sirenes y sintir cerquina del cogorote el airazu de la porra. Tocome dar berros pela cai Uría y na Escandalera reclamando “amnistía y llibertá”. Tocome dir pa la mili a sirvir a la patria y a pegar barrigazos xugando a la guerra contra aquel enemigu desconocíu. Tocome pasar en claro la nuechi del 23 F de Tejero. Tocome ser presidente de mesa de electoral una pila veces. Tocome tar de güelga nos conflictos de la minería…Tocome. En toos estos años, tocárenme munches coses, buenes, regulares y males.

Pero enxamás me tocó ver la inmundicia, la bazofia, la esllava que tenemos agora. Enxamás vi una clase dirixente tan mentirosa y deshumanizá. Enxamás vi un mundu sindical tan rastreru y vendíu. Enxamás vi una trama empresarial tan avariciosa y esplotaora. Enxamás vi unos clérigos tan integristas y dexeneraos. Enxamás vi que los lladrones ocuparen tantos altos cargos. En xamás vi una xusticia tan inxusta. Enxamás vi un país tan rutu, tan a la deriva, tan dividíu, tan asfisiáu, tan desigual, tan atormentáu, tan saqueáu, tan asqueáu de todo. Enxamás de los xamases.

Bueno, a lo meyor ye que ya me toi faciendo mayor y ya veo mal