El grupu Maraviyes del Cosmos, hoy vienres nel Nuevu Teatru La Felguera a les 19.00 hores

Hoy vienres, 5 de marzu, el Nuevu Teatru La Felguera va acoyer un conciertu del grupu asturianu Maraviyes del Cosmos, jazz fusión de gran calidá.

Maraviyes del Cosmos ye ún d’esos grupos llamaos a convertise en banda de cultu. Anque se trata d’un proyectu de recién formación, sus miembros son profesionales veteranos y de reconocíu prestixu dientro de la escena musical asturiana. Xaime Arias al pianu, Oscar Santos col baxu, el baterista Willón Decalle y Lafu a la guitarra formen un grupu de muncha calidá y fuerza nel escenariu. Maraviyes del Cosmos tien un claru apueste estéticu: arrexuntar la fuerza espresiva del rock cola complexidá armónica y rítmica del jazz.

El so esquisitu trabayu compositivu, enllenu de melodíes inspiraes y de riffs tan vibrantes como acertaos, vese reforzáu gracies a una esperimentación constante col soníu y a unes ellaboraes igües. Los sos solos vertixinosos, plagaos de guapura y virtuosismu, son una de les baces principales nos sos conciertos. La puesta n’escena ye mui dinámica y la experiencia d’asistir a una de les sos actuaciones ye absolutamente recomendable tanto pal públicu entendíu como pal qu’empieza a conocer el mundo máxicu de la música improvisada.