Los tres premios del “concursu de cuentos pola oficialidá” van pa la cuenca’l Nalón

L’escritor Pablo Rodríguez Medina (L’Entregu, 1978) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu venticuatro. El primer premiu, dotáu con 600 euros, foi pa la so obra “En brazos de naide”. El segundu premiu, dotáu con 450 euros, foi pal cuentu “Enguedeyos y mentires”, de Solinca Turbón Cuesta (La Felguera, 1981), y Gonzalo González Barreñada (Sotrondio, 1973) algamó’l tercer premiu al que se-y apurren 300 euros, con “La muerte d’acebache”. Nesta edición el xuráu tuvo compuestu polos escritores Xulio Vixil, Paco Álvarez y José Ángel Gayol. Nes próximes selmanes l’Ayuntamientu Bimenes dará anuncia de la fecha d’entrega del premiu, actu nel que l’autor fadrá llectura pública del cuentu ganador.

Pablo Rodríguez Medina ye Llicenciáu en Filoloxía Hispánica y Especialista en Filoloxía Asturiana. Escritor dende bien mozu, delles de les sos obres lliteraries merecieron premios como’l Xosefa Xovellanos de novela, por “L’Arna de San Atanás”, el Teodoro Cuesta de poesía, por “Aires de mudanza” o’l de creación lliteraria de l’Academia de la Llingua Asturiana, por “Les vueltes, toles vueltes”. Al marxe de los llibros publicaos n’asturianu, tamién tien delles obres asoleyaes en castellán. Ye de destacar que dende 2020 ye miembru de l’Academia de la Llingua Asturiana como académicu correspondiente. Y no que cinca al certame yerbatu, ye l’escritor que más vegaes lu ganó algamando’l primer premiu notres cinco ocasiones, nos años 2002, 2003, 2007, 2010 y 2017.