Samartín torna al asturianu les noticies del portal web del conceyu y los conteníos fixos

L’Ayuntamientu de Samartín del Rei Aurelio remató la torna al asturianu de los conteníos fixos del portal web municipal al tiempu que reanudó la publicación de noticies en llingua asturiana nel mesmu portal.

El procesu de traducción de la web al asturianu “nun se da por finalizáu sinon que va continuar nel tiempu pues tien qu’entendese nel marcu de la  tresformación dinámico del propiu portal web, onde se revisen, renueven ya incorporen contenios periódicamente”, esplicó la conceyala de Cultura, María Alonso.   Con esti llabor “tratamos de normalizar, potenciar y fomentar l’usu del asturianu ente la población del conceyu”, argumentó la edil.

L’accesu a los conteníos  n’asturianu ye  mui cenciellu y actívase calcando na bandera d’Asturies qu’aparez na parte superior izquierda del portal web na dirección smra.org. A partir d’ehí, tantu los conteníos de les diferentes estayes que s’organiza el portal web como’l bloque de noticies qu’aparez de manera destacada na portada van poder lleese en llingua asturiana; inda non nel portal de tresparencia, entá en procesu de dotación de contenios, que va entamase nuna siguiente fase.