La cerveza artesano “aterriza” en Llangréu
FICAL vuelve a marcar la programación d’abril con un festival alredor de la cerveza, la gastronomía y la música en directu
Llangréu prepárase pa una de les sos celebraciones más emblemátiques, el Festival Internacional de la Cerveza Artesano, que va tener llugar ente los díes 14 y 16 d’abril. Un eventu que yá empieza a tener solera y qu’atrái a una gran cantidá de públicu tanto pola calidá de la cerveza que se preba nos stands como poles actividaes d’ociu que se desenvuelven nel eventu. Y ello ye que, dende l’empiezu, el festival márcase pol éxitu. En gran midida pol aciertu que supón saber combinar a la perfección cultura cervecera, gastronomía y música en directu.
L’Ayuntamientu de Llangréu, en collaboración con La Felguera Colectivu Cultural, vuelve a poner en marcha una celebración que vuelve a celebrase nos xardinos de la Pinacoteca Municipal Eduardo Úrculo. La programación d’esti añu contempla actuaciones musicales de primer nivel que van dir programándose nos dos escenarios habilitaos pa ello, de manera alterna, pa que la buena música nunca dexe de sonar. Rescampla, sobre manera, la presencia de grupos rexonales con gran arraigu na zona como “International Hardcore All Stars”, “Kinkis Gruñones”, “Dixebra” o “Skama la Rede”, pero tamién otres formaciones como “O’Funk’illo, “Mausoleo”, “Niña Coyote Eta Chico Tornado” o “Miguel Costas”.
No que se refier a la escoyeta cerveces Fical va volver a xuntar a los maestros cerveceros más representativos del panorama rexonal, nacional ya internacional siempre teniendo en cuenta la calidá de les sos ellaboraciones. Amás, el requisitu indispensable pa qu’estes “cases” tean presentes va ser, otra vuelta, la presencia de los maestros cerveceros que faen posible la ellaboración d’esti oru líquido. Y ello ye que, dende la organización, entienden que cuntar con ellos supón un aliciente más na celebración de la Feria Internacional de la Cerveza yá que son ellos y elles los que pueden dar a “conocer dende un puntu de vista didácticu y divulgativu los procesos y técniques de fabricación, así como los diferentes tipos de malta, lúpulu, y llevadura qu’utilicen nel procesu”. Con too ello, nesta edición van tar presentes 19 cerveceres del ámbitu asturianu, nacional ya internacional. Son: Caleya, Asturias Brewing Company, D’Equi, Naparbier, Laugar, Dougall’s, Sáez&Son, Garage, La Pirata, La Grúa, Redneck, Saltus, Basqueland, San Frutos, 3 Monos, Lerving, Prizm, Akia Birgghus y Brew by numbers.
Tocante a la gastronomía, el festival va tratar d’adaptase pa tolos gustos y necesidaes de los asistentes con comida sin gluten, vegano, vexetariano, tex mex, d’inspiración oriental, venezolano, y de races autóctones asturianes y gallegues. Así, el recintu de Fical va cuntar cola presencia de 7 foodtrucks: Les Caleyes, Lujuria, La Pavoneta, La Chama, Los Mexicanos, Astursabor, y Rock&Dog.
Como vien siendo vezu nesti eventi, el Festival Internacional de la Cerveza Artesano de Llangréu va cuntar con charres y actividaes complementaries. La primera de les charres van ponela David Montes, David Castañón y Pablo Vizcaíno y va tratar sobre “Preba maridaxe de Cerveces y quesu”. La segunda, col títulu “Compañeru dame birra” va ponela David García Fernández de Grisú Beer. Nel festival van concedese tamién dos gallardones: el “Ficalín” pa la mejor cerveza y el “Ficalucu”, que va ser el premiu especial del públicu. Cuntando cola collaboración del Área d’Igualdá, el festival va disponer d’un espaciu de ludoteca con xuegos y talleres pa los más pequeños y un espectáculu d’animación de cai.
Los actos van empezar el próximu 14 d’abril a les cinco la tarde con una preba concursu nel recintu ferial. Pa les seis, va tener llugar l’apertura oficial del festival nel “Escenariu Roces” amenizada pola actuación de la banda de Gaites Conceyu de Llangréu. Una hora más tarde va facese entrega del troféu del concursu y va pinchase’l barril Cask pa la degustación popular. Pa les ocho y media de la tarde va empezar el primer conciertu de Fical a cargu de “Kinkis Gruñones”. Los conciertos van dir asocediendo cola presencia d’“International Hardcore All Stars ” (21,45 h); “O’Funk’Illo (23 h); Dixebra (00, 45 h); y “Skama la Rede” (2, 15 h).
El sábadu 15 el recintu ferial va abrir cola charra de “Preba y Maridaxe de Cerveces y Quesu” a les 13 h. Tamién a esta hora va tener llugar, nel escenariu Roces, el conciertu de “Los Jimaguas”. Yá na tarde, concretamente a les 18 h, va haber una charra titulada “Compañeru Dame Birra” a cargu de David García Fernández. Pa les 19, 30 hores va empezar el conciertu de “Polemika” nel escenariu Roces. De siguío, van subir pa mesmu la formación musical “Pin Pals” (21 h). Les actuaciones musicales nel escenariu principal van ser los conciertos de “Niña Coyote eta Chico Tornado” (22,15 h); “Mausoleo” (23, 45 h); “Miguel Costas; y “Los Bárcenas” (1, 30 h).
El domingu, 16 d’abril, los actos van empezar pa la una la tarde col espectáculu infantil “Serabalam”. A les 14 h. “2 Insolentes” van poner la primera de les actuaciones musicales del día. A les cuatro la tarde va facese la entrega premios pa la meyor cerveza y, a les cinco, va actuar nel escenariu Roces el grupu “Terrenal”. La clausura de la Feria Internacional de la Cerveza Artesano de Llangréu va ser a les ocho.