Torna la cerveza a Llangréu
En Llangréu, la primavera va años que supón dalgo más qu’entrar pa una estación cálida y lluminosa. La primavera, en Llangréu, ye la época qu’acueye una de las cites más importantes del conceyu, el Festival de la Cerveza Artesano. Un eventu de carácter añal qu’axunta a productores de cerveza artesano de la rexón, nacionales ya internacionales, ufiertando pa tol públicu una variedá mui amplia cerveces de calidá máxima y sabor únicu. La propuesta pa este añu engloba a 18 cerveceres artesanes, coles que los visitantes a esti eventu van poder descubrir sabores y golores únicos de la meyor cerveza artesano nun ambiente festivu y acoyedor
L’Ayuntamientu de Llangréu cola collaboración de la Compañía A Mansalva presenten el Festival Internacional de la Cerveza Artesano d’Asturies que va desenvolvese los díes 11, 12 y 13 d’abril. Como n’ocasiones anteriores, el festival va tener llugar nos xardinos de la Pinacoteca Municipal Eduardo Úrculo ufiertando una gran propuesta musical, una interesante selección de cerveceros nacionales ya internacionales y una gran variedá gastronómica con foodtrucks qu’atienden pa tolos gustos y necesidaes. La cita lleva años consolidada como ún de los eventos más importantes nel mundu craft o cerveceru a nivel estatal con gran éxitu de públicu y con mui buenes crítiques de los cerveceros participantes que lu ponen ente los meyores festivales d’España y Europa. La feria ye una oportunidá perfecta pa que la xente amante de la cerveza pueda conocer de primera mano les últimes tendencies nel mundu la cerveza artesano y pa que los productores puedan dar a conocer les sos creaciones.
Llangréu continúa situándose como una propuesta cultural d’interés, a la vez que crea un puntu d’alcuentru ente públicu y fabricantes, onde tanto neófitos como especialistes pueden conocer de primera mano los procesos y técniques de fabricación o qué tipos de maltes, lúpulos, levadures o otros materiales se utilicen nos procesos.
L’apertura del festival va tener llugar el vienres 11 pa les 18:00 hores, nos xardinos de la Pinacoteca llangreana, col concursu profesional de cerveza artesano, la yá clásica pinchada y preba gratuita del cask y el pregón inaugural a cargu del grupu Muyeres.
La programación músical d’esti añu vuelve a ser de gran nivel, tres díes nos que la música nun va parar, sucediéndose de forma alternativa nos dos escenarios habilitaos pa ello, l’escenariu Roces y l’escenariu Revibeer pa la noche. La programación musical contempla la presencia de 14 grupos: nel escenariu Revibeer van actuar un total de 8 grupos, y nel escenariu Roces 6 bandes. Paga la pena destacar esti añu la propuesta “Asturies, País Punk Rock” que va facer homenaxe a esti estilu musical n’Asturies, una banda de cinco músicos compuesta por Luis Vázquez (batería), Carlos Álvarez (baxu), Dany León (guitarra), Juan Bertrand (guitarra) y José Manuel Tejedor (gaita) van tocar clásicos del punk rock, canciones de Dixebra, Mala Reputación, Misiva, Desakato, Los Berrones, Ochobre, La Morgue, Skontra, etc… Temes a los que van poner voz dellos cantantes asturianos como Pablo Senator, Ramón Blanco, Xune Elipe o Marisa Valle Roso. Tola programación musical va dir publicándose con tou detalle en www.llangreucultural.com y redes sociales de Llangréu Cultural.
No que fai referencia a la escoyeta cerveces, el festival va volver a xuntar a les cerveceres más representatives del panorama siempre teniendo en cuenta la calidá del productu. Nesta edición van tar en Llangréu 18 cerveceres, d’ámbitu asturianu como “Cotoya” o “Asgaya”, nacional como Redneck o Península ya internacional como “Juguetes perdidos“. El festival tamién va contar cola presencia d’otros productores destacaos que van dir anunciándose en www.llangreucultural.com y redes sociales de Llangréu Cultural.
Otru de los puntos fuertes del festival ye’l de la propuesta gastronómica pa maridar colos meyores caldos. Asina, el festival va adaptase a tolos gustos y necesidaes, con comida sin gluten, vegano, vexetariano, d’inspiración oriental¨y de races autóctones cola presencia nel festival d’8 foodtrucks: van ser pocos los que seyan capaces de resistir a degustar dalguna d’estes propuestes
L’actividá alredor de la cerveza va complementase con esposiciones, presentaciones, charres, cursos sobre ellaboración casera de cerveza, estilos y maridaxes, amás de la entrega de dos gallardones, unu decidíu por un xuráu profesional y otru qu’escueye’l públicu.
La pulserina
Si bien la entrada al recintu ye de baldre pa toles xornaes, nel recintu solo puede pagase cola pulserina. Nes barres, casetes de cerveza artesano, foodtrucks y merchandising vas necesitar la pulserina. Amás, nes tres xornaes festives va poder recargase en puntos que van establecese nos xardinos de la pinacoteca, bien con efectivu o con tarxeta bancaria. Ufiértase tamién la posibilidá de facelo al traviés de la web con un códigu QR. Les recargues deben ser múltiplos de cinco. De nun gastar tol créditu de la pulserina la organización permite la posibilidá de recuperar l’importe hasta’l 21 d’abril dende la páxina www.llangreucultural.com. Solo queda que, los y les amantes de la cerveza y la meyor música en directu vuelvan a confiar, como faen tolos años, na propuesta llangreana y s’acerquen al conceyu pa disfrutar de la gran feria de la cerveza artesano que cada añu se reivindica y crez en Llangréu. Una cita que vien manteniendo un gran nivel y a la qu’asisten una montonera vecinos y vecines de la cuenca amás de munchos visitantes de tolos puntos de la rexón y l’estáu.