Alcuentru con Marián González en Blimea

La Casona del Bravial acoyó un alcuentru con motivu de la esposición “La Puerta del Ánxel” de l’artista blimeína Marián González Fanjul, que se pue visitar nesti centru cultural dende’l pasáu 14 de xunetu.

Nel alcuentru los asistentes tuvieron ocasión de visitar la muestra y compartir impresiones cola autora sobre los testos, dibuxos y material audiovisual que se presenten, y a traviés de los que l’autora nos tresporta a un mundu d’opuestos, onde la lluz y la escuridá y el bien y el mal s’entemecen pa facenos reflexonar sobre la nuestra propia esistencia, too ello a traviés de la historia d’un ánxel qu’abandona’l paraísu.

Los asistentes destacaron la “dimensión distinta, inquietante y bella” de lo espuesto y el mou en que ésta “tresmite emociones a traviés de les pallabres y el dibuxu con una historia contada, pero sobre too, sintida, na que se muestren les paradoxes de la pesllera y la apertura o la lliberación y la pérdida”.