Los Xueves de Castilletes y Carbón V Xornaes Culturales De Castilletes y Carbón
El Centru de Referencia de la Cultura y la Llingua Asturiana Casa de los Alberti de Ciañu va acoyer, mañana 4 de payares a les 12:30 de la mañana, la presentación de Los Xueves de Castilletes y Carbón. Esta actividá enmárcase dientro de la programación de les V Xornaes Culturales De Castilletes y carbón qu’organicen la Fundación Nuberu y l’Ayuntamientu de Llangréu.
Dempués de rematar esti mes d’ochobre’l ciclu cine Baxando pa la galería, les xornaes culturales De castilletes y carbón siguen col programa charres Los xueves de castilletes y carbón que van desenvolvese tolos xueves d’esti mes de payares na Casa los Alberti de Ciañu. Esti ciclu ábrese’l xueves 6 a les 20:00 hores con Pablo Xuan Manzano que va lleer la ponencia Academia de la Llingua Asturiana, 30 años de trabayu.
Los xueves de castilletes y carbón van siguir coles intervenciones de los cineastes Marcos Martínez (Remine) y Pablo Casanova (Bernabé); Ana González Rodríguez, Conseyera d’Educación Cultura y Deporte del Principáu d’Asturies; y un recital poéticu d’escritores asturianos coordináu por Chechu García.
L’actividá de De castilletes y carbón se complementa cola esposición La Mina y la Mar que pue visitase demientres esti mes de payares na Casa los Alberti de Ciañu y va rematar el 4 d’avientu, día de Sta Bárbara, con un conciertu del grupu Nuberu.