El tráficu na Pola

Desde que tenemos coche tos, el tráficu ye un problema en cualquier sitiu. Na Pola más. Nun hay una explicación lóxica pero ye asina. Debemos tener una capacidá innata pa descontrolar y alloquecer a los demás a base d’estorbar, de usar poco la cabezona y de escaecese d’ellos. Les normes tan pa los de juera, non pa los de acá. Ye esa inorancia de creer que la carretera al llau casa ye tuya y nella pues facer lo que quieas. Asina, traficar po la Pola ye una aventura. Les coses que te ficieron memoriciar na autoescuela, nun valen. En Laviana rixen otres normes. Aquí pues taponar les calles sin problemas. Aquí pues aparcar onde quieas cuantu tiempu te patezca.

Pa tratar d’arreglar el asuntu, sobre to na carretera xeneral, l’ayuntamientu quier poner el tráficu de dirección única, en circuitu. Supongo que co la xeneral pa Barredos y la cai Pelayo Cares pa la Chalana, y supóngolo porque ye lo más cómodo pa les llínies d’autobuses. El casu ye que por culpa xente insolidaria, incívica y pasota, vamos gastar más gasolina y contaminar más el pueblu, porque va tocamos dar güeltes y arrodiar como tontos pa llegar a dellos llaos. Vamos tener más tráficu, peor aire, más roíu, menos perres y menos seguridá, sobre to los peatones. Co lo fácil que ye solucionar el problema.

Y ye tan cenciello como pintar una raya continua mariella o blanca a lo llargo d’una oriella de la carretera xeneral, poner les siñales pertinentes y pasase unos mesucos controlando pa que’l personal vea que la cosa va en serio. Al otru llau pue pintase una llínia a trazos dexando sitiu pa carga y descarga o pa estacionar tres menutos pa un asuntu rápidu. Tamién, como dicen algunos, pue tornase al sistema d’antes, siñales que dexen aparcar una quincena del mes a un llau y otra al utru. Porque viendo lo que hay, paez claro que lo de únicu sentíu, pa xente que nun lu tien, nun diba miyorar na. Ye fácil que dexaren aparcar nos dos llaos de la calzá y seguro, seguro qu’esa mesma xente fadríalo en doble filera a la mínima. Porque’l problema nun ye’l tráficu rodante, el problema ye la moyera de xente que ta penriba la normativa y fae lo que quier.

Asina que por favor, nun creáis que lo de dirección obligá va solucinar el tráficu na Pola pa tol siglu, menudu otimismu, lo que pue ye acarriamos más problemas. Facer cumplir les normes, esa ye la solución.