El nuevu partíu asturianista Aína constitúi esti xueves nel Nalón la so primer agrupación llocal

La formación celebra na Casa la Cultura de Sama a les 19.30h la primer actividá pública tres del so Congresu Fundacional

Aína echa a andar. Dempués d’inscribise más de 170 persones y del Congresu Fundacional cellebráu’l 6 de payares, esti nuevu partíu políticu asturianista y d’izquierdes va constituyir esti xueves 22 la so primer Agrupación Llocal. La cita va ser na Casa la Cultura de Sama a les 19.30h de la tarde, nella van tratase delles problemátiques qu’afecten a la Cuenca’l Nalón y l’actu ta abiertu tamién a la participación de xente que tovía nun s’inscribió a Aína.

Cola constitución d’esta agrupación llocal, Aína entama la campaña #AbrimosCamín, que contempla un calendariu d’alcuentros en más d’una decena de conceyos de toa Asturies colos que la formación quier activar les sos primeres organizaciones municipales. D’esti mou, el partíu busca consolidar l’afiliación de les persones inscrites, aportar a más xente y entamar el so trabayu políticu dende la cercanía, pa dar respuesta a les necesidaes de parroquies, barrios y conceyos.

Precisamente, el conceptu de cercanía ye ún de los pegoyos principales d’esti partíu asturianista nuevu que tien ente los sos oxetivos asturianizar la política; señalar y poner igua a les desigualdaes sociales n’Asturies; ufrir una alternativa pa qu’Asturies algame les mayores cuotes d’autogobiernu a nivel políticu, económicu, sociacultural y rexenerar la política asturiana.

Cola puesta en marcha de l’Agrupación Llocal del Nalón -de la que tán llamaes a formar parte más d’una ventena de persones-, Aína da’l so primer pasu pa construyir pasín a pasu un asturianismu modernu, apegáu a la realidá asturiana y con un firme compromisu cola xusticia social, con una economía qu’afite futuru n’Asturies, col feminismu, col territoriu, colos servicios públicos, cola democracia participativa, colos derechos humanos, col internacionalismu y cola cultura.