Curties y con premio
El XI Concursu de Narraciones Curties Conceyu Llaviana, entamáu pola Oficina de Normalización Llingüistica, yá tien ganadores. El xuráu, formáu por María García Fernández, Constantino Manuel Blanco González, Pablo Xuan Manzano Rodríguez y Mónica Rodríguez Riesgo, decidió dar el primer premiu, dotáu con 400 euros, a Pablo Rodríguez Medina pol rellatu L´alemán errante; el segundu premiu, dotáu con 150 euros, correspondió a Paula Pulgar Alves pola narración Asia Box.
El concursu cuenta con una ayuda económica de la Conseyería d´Educación, Cultura y Deporte del Principáu d´Asturies.
Pablo Rodríguez Medina, (L’Entregu, 1978), llicenciáu en Filoloxía Hispánica y Especialista en Filoloxía Asturiana ye un escritor billingüe les sos obres, mesmo nuna como n’otra llingua, algamaron delles distinciones tanto a nivel rexonal como nacional como Premiu a la creación lliteraria de l’Academia de la Llingua Asturiana por Les vueltes, toles vueltes; Premiu Asturies Xoven de Poesía por Los desconocedores del agua; Premiu de teatru de l’Academia de la Llingua Asturiana por Orbaya; Premiu Teodoro Cuesta, añu 2006, pol poemariu Aires de mudanza y Premiu Xosefa Xovellanos, pola novela L’Arna de San Atanás.